1 Thessalonians 5

A DUEN ansau o auer, ri ai kan, menda i en intin won komail.

Pwe pein komail asa mau, me ran en Kaun o pan pwarado dueta lipirap amen ni pon.

Pwe irail lao pan inda: A muei mau, o sota apwal kot mia, I ansau kaupa pan lel on irail dueta li lisean amen; a irail sota pan pitila.

A komail ri ai kan, solar mi ni rotorot, pwe ran o de konodi komail duen lipirap amen.

Komail karos seri en marain, o seri en ran. Kitail so kisan pon o rotorot.

Kitail ari ender mamair dueta me tei kan, a kitail en masamasan o daulikin.

Pwe me mair, kin mamair ni pon, o me sokolar, kin sokolar ni pon.

A kitail, me kisan ran, en liki san, til won nan pere pan marmar en poson o limpok, o lisoropeki kaporopor pan maur.

Pwe kaidin onion, me Kot kotin kileledi on kitail, a sen konodi maur soutuk ki atail Kaun Iesus Kristus,

Me mata kin kitail er, pwe ma kitail papat de mamair, en maur pena re a.

Komail ari panau o sauas pena nan pun omail duen me komail kin wia.

A se poeki re omail, ri ai kan, komail, en apwali me kin dodok nan pun omail, o me kaun komail da pan Kaun o, o me kin panaui komail.

Komail kaka kin ir kaualap ni limpok, pweki ar wiawia; o komail popol pena.

Se panaui kin komail, ri ai kan, komail en kapun on me katiwo kan, o kamait, me ar poson tikitik, o apapwali me luet akan, o kanonama on karos.

Komail masamasan, pwe amen ender depukki on amen me sued me sued, a en inon ion me mau eta nan pun omail o on amen amen.

Komail pereperen ansau karos.

Kapakapta soutuk.

Komail danke ni meakaros, pwe iduen kupur en Kot ren Kristus Iesus on komail.

Der kakundi Nen.

Der mamaleki deideikop akan.

Kasoson on meakan karos, ap koledi me mau.

Liki san son en sued karos.

A Kot en popol en kasaraui komail la kaualap, nen omail, o monion omail, o war omail en nekinek mau on en atail Kaun Iesus Kristus a pwarado.

Melel i, me kotin molipe komail er, me pan pil wiada.

Ri ai kan kapakapa kin kit.

Ranamauki ri at akan karos metik saraui.

I kauki on Kaun, me komail pan wadok kisin likau kis et on saulan saraui kan karos.

Mak en atail Kaun Iesus Kristus en mi re omail!